Panyabab Banjir

Babarapa hari hini hujan bilang turun daras banar, maka sampai dua talu kali sahari.Untungnya di Banjarbaru hini, saluran banyu nang ada kada pati bamasalah. Tapi tatapai nangkaya di daerah Kamuning, rumah buhannya calap kabanjiran.

“Buhan pian nyaman, sudah didaerah nang tinggi, saluran banyunya bagus pulang, jadi kada sawat limpuar maulah calap rumah,” jar Amang Adur
“Nah karana nyawa mahakuni badiam dipinggiran sungai, tanggungai resikonya,” jar Julak Unjun.
“Amun masalah mananggung tu sudah matan dahulu, tapi maksud unda saharusnya buhan Pemda nitu mamikirakan kayapa sakira masalah banjir hini kada tarasai lagi ulih kami nang ada disana,” sambat Amang Adur.

“Nitu dasaram tugasnya buhan Pemda, tapi buhan masyarakat jua harus bisa lawan mau manjagai lingkungannya surang, tarutama banar jangan lagi mambuang sampah ka sungai, nang maulah surut lawan maulah panyakit,” jar Julak Unjun
“Babarapa tahun hini unda itihi, buhan kampung nang badiam di sakitaran Sungai Kamuning kada ada pati nang mambuang sampah ka sungai lagi, tapi tatapai banjir, kanapalah panyababnya?” jar Amang Adur pina bapicik kapala.
“Panyabab napa Mang?” takun Utuh Amak nang hanyar cungul.
“Panyabab banjir di Kamuning Tuh’ai,” sambat Amang Adur.
“Jah pian hini, panyabab banjir di Kamuning haja kada tahu,” jar Utuh Amak sambil ma igut gogodoh pisang.
“Nyawa tahu garang napa panyababnya?” takun Amang Adur.
“Anak TK gin tahu, panyabab banjir nitu pastiam banyu nang limpuar matan sungai, kaitu haja buhan pian kada tahulah,” jar Utuh Amak kada tahu-tahu muha.
Amang Adur lawan Julak Unjun am langsung mamusut kadada, malihat kapintaran Utuh Amak nang limpat pada jenius.(@julakunjun)